Noise company ne apni nayi smartwatch NoiseFit Pro 6R ko India me launch kar diya hai. Noise ki ye watch ab company ki official website ke saath-saath Flipkart aur Amazon par bhi available ho gayi hai.Agar aap NoiseFit Pro 6R watch kharidna chahte hain, to bata dein ki leather ya silicon strap variant ki keemat ₹6,999 rakhi gayi hai. Wahin metal strap wale model ki keemat thodi zyada, ₹7,999 hai. Company ne is watch me color options bhi kaafi diye hain, jisme black, brown aur gold jaise colors shamil hain.
NoiseFit Pro 6R Design and Display
Is smartwatch me 42mm ka round dial diya gaya hai, jo dekhne me kaafi stylish lagta hai. Isme 1.46-inch ka AMOLED display laga hua hai. Screen ki brightness kaafi zyada hai kyunki isme 1,000 nits ki peak brightness milti hai.Is high peak brightness ki wajah se tez dhoop me bhi watch ki screen clearly dikhai deti hai. Watch ke right side par ek button aur ek crown bhi diya gaya hai, jisse navigation aur use karna kaafi easy ho jata hai.
NoiseFit Pro 6R Tracking Features
NoiseFit Pro 6R ghadi me fitness ka dhyaan rakhne ke liye kaafi saare features diye gaye hain. Ye watch aapka heart rate aur blood-oxygen (SpO₂) level regular basis par monitor karti rehti hai. Isme sleep quality ko samajhne ke liye Sleep Score ka feature bhi milta hai.Iske saath hi ye aapke body fatigue ko analyze karke Readiness Score bhi batati hai. Women health ko dhyaan me rakhte hue isme Menstrual Cycle Tracking ka option bhi diya gaya hai.
Battery Life and Charging Details
Battery ke maamle me ye watch kaafi achha performance deti hai. Company ka claim hai ki ek baar full charge karne par ye lagbhag 7 din tak continuously chal sakti hai. Agar watch use me nahi ho, to iska standby time 30 din tak ka bataya gaya hai.Charging bhi zyada time nahi leti. Ye ghadi sirf 2 ghante me 0 se 100% tak poori tarah charge ho jaati hai.
Durability and Smart Features
Noise company ki ye watch Android aur iOS dono tarah ke smartphones ke saath easily connect ho jaati hai. Isme IP68 rating di gayi hai, jo isse dhool aur paani se protect karti hai. Company ka claim hai ki ye watch 100 meter tak paani ke andar safe reh sakti hai.Isme GPS aur Strava ka support bhi milta hai, jisse aap apni running aur walking activities ko accurately track kar sakte hain. Saath hi is smartwatch me Noise AI Pro ka support bhi diya gaya hai.
